Prokuroria Themelore në Prishtinë ka njoftuar se ka autorizuar Policinë e Kosovës, përkatësisht Drejtorinë për Hetimin e Krimeve Ekonomike dhe Korrupsionit, për grumbullimin e provave lidhur me dyshimet për kryerjen e veprave penale kundër të drejtave të votimit, sipas Kapitullit XVIII të Kodit Penal të Republikës së Kosovës (KPRK).
Sipas njoftimit zyrtar, gjatë procesit të numërimit të votave në komunën e Podujevës janë evidentuar dyshime për parregullsi, përkatësisht mospërputhje në numrin e votave të kandidatëve për deputetë në Kuvendin e Republikës së Kosovës pas përfundimit të numërimit.
Prokuroria Themelore në Prishtinë dhe Policia e Kosovës kanë theksuar se mbeten të përkushtuara në luftën kundër kriminalitetit, forcimin e sundimit të ligjit dhe vënien para përgjegjësisë ligjore të të gjithë atyre që bien ndesh me ligjin.
Hetime të ngjashme kanë qenë në zhvillim më herët në Prizren, Malishevë dhe rajonin e Mitrovicës, ndërsa institucionet kanë bërë me dije se do të vazhdojnë monitorimin dhe verifikimin e procesit zgjedhor për të siguruar integritetin e tij.