Punonjësit e transportit publik në mbarë Gjermaninë kanë hyrë sot në grevë njëditore, duke kërkuar përmirësim të kushteve të punës dhe duke shkaktuar ndërprerje të mëdha në qarkullimin urban. Aksioni sindikal vjen në një kohë të vështirë për udhëtarët, të cilët po përballen gjithashtu me rrugë të akullta dhe kushte të rënda dimërore.
Greva, e thirrur nga sindikata “Verdi”, ka nisur që në orën 03:00 të mëngjesit, duke pezulluar qarkullimin e autobusëve, tramvajeve dhe metrosë në shumicën e qyteteve gjermane. Sipas sindikatës, aksioni ka prekur 15 nga 16 landet federale të Gjermanisë, duke përfshirë pothuajse të gjithë rrjetin e transportit publik urban.
Përjashtim nga greva bëjnë rreth 5 mijë punonjës të transportit publik në landin verior të Saksonisë së Poshtme, të cilët nuk marrin pjesë për shkak të një marrëveshjeje ekzistuese që i ndalon të përfshihen në veprime sindikale të këtij lloji.
Veprimi sindikal nuk prek shërbimet e udhëtimit në distanca të gjata, si dhe trenat rajonalë dhe ata periferikë që operohen nga kompania shtetërore hekurudhore “Deutsche Bahn”, të cilët vazhdojnë të funksionojnë normalisht.
Ndërkohë, negociatat për një marrëveshje të re kolektive janë duke u zhvilluar me shoqatat lokale të punëdhënësve në të 16 landet federale. Sindikata “Verdi” kërkon përmirësime të ndjeshme të kushteve të punës, duke përfshirë uljen e orëve javore të punës dhe kohëzgjatjes së turneve, rritjen e periudhave të pushimit, si dhe shpërblime më të larta për turnet e natës dhe punën gjatë fundjavës.
Sipas sindikatës, në landet e Bavarisë, Brandenburgut, Saarlandit dhe Turingisë, si dhe në rrjetin e metrosë së Hamburgut, në kuadër të negociatave po diskutohen edhe rritje pagash për punonjësit e transportit publik.
Kreu i ekipit negociator të “Verdi”, Serat Canyurt, ka deklaruar se prioriteti kryesor i sindikatës mbetet arritja e përparimit në tryezën e negociatave. Ai ka theksuar se greva nuk është një zgjedhje e dëshiruar, veçanërisht duke pasur parasysh kushtet e vështira të motit dimëror.
Pjesë të Gjermanisë janë përfshirë nga temperatura nën zero dhe reshje dëbore, duke shkaktuar vështirësi shtesë në transportin publik, përfshirë edhe kryeqytetin Berlin, ku qarkullimi është ndikuar ndjeshëm.