Ministrja e Arsimit, Mirela Kumbaro, u është drejtuar sot maturantëve me një mesazh informues dhe motivues, duke njoftuar se nga kjo e hënë ka nisur procesi i plotësimit të formularit A1. Përmes këtij formulari, nxënësit përcaktojnë lëndët me zgjedhje që do të japin në provimet e Maturës Shtetërore 2026.
Kumbaro theksoi se ky është një vendim me rëndësi të veçantë, pasi zgjedhja e lëndëve ndikon drejtpërdrejt në orientimin akademik të maturantëve dhe në studimet e tyre të mëtejshme. Ajo u bëri thirrje nxënësve që të mos e marrin këtë vendim në mënyrë të nxituar, por ta analizojnë me kujdes çdo zgjedhje.
Duke iu drejtuar maturantëve, ministrja theksoi rëndësinë e konsultimit me mësuesit dhe prindërit përpara plotësimit të formularit. Sipas saj, vendimi që merret në këtë fazë do të ketë ndikim të drejtpërdrejtë në rrugën akademike që do të ndjekin nxënësit pas përfundimit të shkollës së mesme.
Ministrja informoi gjithashtu se për maturantët e viteve të mëparshme, aplikimi përmes formularit A1Z do të zhvillohet në datat 10 dhe 11 shkurt. Ajo sqaroi se për këtë kategori aplikantësh afatet janë të kufizuara dhe kërkoi që procesi të ndiqet me vëmendje.
Sipas Kumbaros, Drejtoritë Rajonale Arsimore, zyrat arsimore dhe shkollat janë të angazhuara për të ofruar asistencë gjatë gjithë procesit të aplikimit. Ajo bëri të ditur se në qytete të ndryshme janë përcaktuar data specifike për mbështetjen e aplikantëve, ndërsa mësuesit, drejtuesit e shkollave dhe strukturat arsimore do të jenë në dispozicion për t’i ndihmuar maturantët dhe aplikantët e viteve të mëparshme në çdo hap të procesit.