Presidenti i Shqipërisë, Bajram Begaj, niset sot për një vizitë dyditore në Itali, ku do të marrë pjesë në ceremoninë zyrtare të hapjes së Lojërave Olimpike Dimërore Milano-Cortina 2026. Lojërat do të nisin më 6 shkurt dhe Begaj do të bashkohet me udhëheqësit botërorë në pritjen e madhe që do të shënojë nisjen e këtij eventi të rëndësishëm ndërkombëtar.
Pak ditë më parë, Presidenti Begaj i dorëzoi flamurin kombëtar ekipit shqiptar të skiatorëve që do të përfaqësojë vendin në këtë edicion të Lojërave Olimpike. Shqipëria do të ketë katër përfaqësues në Milano-Cortina 2026: Lara Colturi, Denni Xhepa, Lisa Brunga dhe Semire Dauti.
Gjatë vizitës në Itali, Presidenti Begaj do të takojë presidentin italian, Sergio Mattarella, si dhe do të zhvillojë bisedime të tjera me autoritetet italiane. Po ashtu, ai do të takojë komunitetin shqiptar dhe arbëresh në rajonin e Lombardisë, duke theksuar lidhjet e forta mes dy vendeve.