Japonia ka shënuar një moment historik në fushën e eksplorimit detar dhe sigurisë së burimeve, duke arritur të nxjerrë sedimente që përmbajnë minerale të rralla nga thellësitë e oqeanit, në kuadër të një misioni testues në det të thellë. Bëhet fjalë për përpjekjen e parë në botë për nxjerrjen e këtyre mineraleve në një thellësi prej rreth 6,000 metrash.
Operacioni u realizua nga anija shkencore japoneze e shpimit Chikyu, e cila u nis muajin e kaluar drejt ishullit të largët Minami Torishima, në Paqësorin Jugor. Zona konsiderohet jashtëzakonisht e pasur me minerale të rralla dhe, sipas vlerësimeve, mund të përmbajë deri në 16 milionë tonë depozita, përfshirë elemente si disprosiumi dhe itriumi, të domosdoshme për prodhimin e magneteve, lazerëve dhe teknologjive të avancuara.
Zëdhënësi i qeverisë japoneze, Kei Sato, e cilësoi misionin si një “arritje domethënëse”, duke theksuar rëndësinë e tij për sigurinë ekonomike dhe zhvillimin strategjik detar të vendit. Ai bëri të ditur se analizat laboratorike do të përcaktojnë saktësisht përqindjen dhe cilësinë e mineraleve të rralla të nxjerra.
Ky zhvillim vjen në një kohë tensionesh të shtuara gjeopolitike, teksa Japonia ka shprehur shqetësime se Kina mund të kufizojë eksportet e mineraleve të rralla. Kina është furnizuesi kryesor global i këtyre elementeve dhe së fundmi ka vendosur kufizime për disa produkte që mund të përdoren edhe për qëllime ushtarake, duke rritur pasigurinë në zinxhirët globalë të furnizimit.
Mineralet e rralla, që përfshijnë 17 elemente kimike, janë thelbësore për teknologjitë moderne, si automjetet elektrike, turbinat e erës, pajisjet elektronike dhe sistemet raketore. Për këtë arsye, zbulimi dhe shfrytëzimi i burimeve të brendshme shihet si një avantazh strategjik për Japoninë.
Misioni përfaqëson një hap të rëndësishëm drejt diversifikimit të burimeve të furnizimit me minerale të rralla, duke synuar uljen e varësisë nga Kina dhe forcimin e rolit të Japonisë në zhvillimin e teknologjive të së ardhmes dhe në tregjet globale.