Në Prishtinë është zhvilluar një protestë kundër propozimit për rritjen e çmimit të energjisë elektrike, e cila sipas paralajmërimeve mund të arrijë deri në 21 për qind. Qytetarët shprehën shqetësimin se një vendim i tillë do të sillte pasoja të rënda ekonomike për familjet kosovare.
Protesta u mbajt para objektit të KEDS-it, pas njoftimit të Zyrës së Rregullatorit të Energjisë (ZRRE) për rritjen e mundshme të tarifave. Demonstruesit theksuan se çmimi aktual i energjisë është tashmë i papërballueshëm për shumë familje, ndërsa një rritje e re do ta përkeqësonte edhe më tej situatën sociale.
Gjatë protestës pati edhe momente tensioni, kur një person i moshuar u shoqërua në polici, pasi u hodh tym i kuq. Aktivisti Erbil Ajdini akuzoi KEDS-in se, sipas tij, për interesa të veta është i gatshëm të dëmtojë rëndë qytetarët.
Protestuesit paralajmëruan se rritja e çmimit të energjisë do të çonte në pamundësinë e pagesës së faturave për një numër të madh familjesh, duke rrezikuar që shumë prej tyre të mbeten pa energji elektrike.
Ndërkohë, Instituti për Politika Zhvillimore (INDEP) i ka bërë thirrje ZRRE-së që në procesin e shqyrtimit të tarifave të sigurojë mbrojtje reale dhe efektive për konsumatorët, duke marrë parasysh gjendjen ekonomike dhe interesin publik.