Shtëpia e Bardhë po përgatit mbledhjen e parë të nivelit të lartë të liderëve të “Bordit të Paqes”, një iniciativë e shpallur nga presidenti amerikan Donald Trump, e fokusuar fillimisht te situata në Gaza. Lajmi raportohet nga Axios, sipas të cilit takimi është planifikuar të zhvillohet më 19 shkurt në Uashington.
Burime të Axios bëjnë me dije se organizimi ndodhet ende në fazë paraprake dhe axhenda mund të pësojë ndryshime. Takimi pritet të mbahet në Institutin Amerikan të Paqes dhe do të shërbejë gjithashtu si konferencë për mbledhjen e fondeve për rindërtimin e Gazës.
Një ditë përpara këtij takimi, më 18 shkurt, kryeministri izraelit Benjamin Netanyahu pritet të zhvillojë një takim me presidentin Trump në Shtëpinë e Bardhë, çka shihet si pjesë e përgatitjeve politike për samitin e Bordit të Paqes.
Deri tani, Shtëpia e Bardhë dhe Departamenti Amerikan i Shtetit nuk kanë dhënë komente zyrtare lidhur me raportimet e mediave.
Presidenti Trump e shpalli krijimin e Bordit të Paqes në fund të janarit, duke theksuar se do ta drejtojë personalisht këtë strukturë, me synimin për të ndërmjetësuar dhe zgjidhur konflikte të mëdha ndërkombëtare. Megjithatë, iniciativa ka ngjallur shqetësime në qarqet diplomatike dhe akademike, ku disa ekspertë paralajmërojnë se ajo mund të dublokojë ose dobësojë rolin tradicional të Kombeve të Bashkuara.
Reagimet ndërkombëtare ndaj ftesës së Trump-it kanë qenë të rezervuara. Disa vende aleate të SHBA-ve në Lindjen e Mesme kanë pranuar të marrin pjesë, ndërsa një pjesë e konsiderueshme e aleatëve perëndimorë kanë zgjedhur të mos përfshihen në këtë fazë.
Ndërkohë, më 28 janar, Shqipëria u bë zyrtarisht anëtare e Bordit të Paqes. Përfshirja u miratua nga Kuvendi me 110 vota pro, si nga mazhoranca ashtu edhe nga opozita, duke autorizuar kryeministrin të përfaqësojë vendin në këtë organizëm. Aktualisht, Bordi i Paqes përfshin 26 shtete, mes të cilave edhe Kosova, ndërsa parashikohet të zgjerohet më tej.
Në mesin e nëntorit, një rezolutë e Këshillit të Sigurimit të OKB-së autorizoi bordin dhe vendet partnere për krijimin e një force ndërkombëtare stabilizimi në Gaza. Kjo vjen në një kohë kur në territor ka nisur një armëpushim i brishtë, i bazuar në një plan të propozuar nga Trump dhe i pranuar nga Izraeli dhe grupi militant palestinez Hamas.
Sipas planit të presidentit amerikan për Gazën, i bërë publik në fund të vitit të kaluar, Bordi i Paqes do të kishte rol kyç në mbikëqyrjen e një administrimi të përkohshëm të territorit, përpara se mandati i tij të zgjerohej edhe në trajtimin e konflikteve të tjera globale.