Presidenti i Shteteve të Bashkuara, Donald Trump, është shprehur se beson që Irani është i gatshëm të negociojë një marrëveshje të re me Uashingtonin për programin e tij bërthamor dhe zhvillimin e raketave balistike.
Në një intervistë për Fox News, Trump theksoi se SHBA-ja ka shtuar praninë ushtarake në rajon, duke paralajmëruar se situata mbetet e hapur për çdo zhvillim. “Një flotilje e madhe po shkon drejt Iranit. Do të shohim çfarë do të ndodhë. Mendoj se ata duan një marrëveshje. Do të ishte gabim i madh nëse nuk do ta bënin. Herën e kaluar shkatërruam kapacitetin e tyre bërthamor dhe mund të veprojmë sërish nëse është e nevojshme”, deklaroi ai.
Sipas presidentit amerikan, Teherani po komunikon drejtpërdrejt me të, ndërsa theksoi se çdo marrëveshje duhet të jetë në interes të Shteteve të Bashkuara. Ai nënvizoi se do të preferonte një marrëveshje që përjashton armët bërthamore dhe raketat, por shtoi se ekziston mosbesim për shkak të përvojave të mëparshme.
Trump rikujtoi qëndrimin e tij kritik ndaj marrëveshjes bërthamore me Iranin, duke akuzuar administratat e Barack Obama dhe Joe Biden se kanë përkeqësuar situatën përmes politikave të tyre.
Deklaratat e tij vijnë në një moment tensionesh të vazhdueshme mes SHBA-së dhe Iranit, ndërsa zhvillimet rreth programit bërthamor iranian dhe sigurisë në Lindjen e Mesme vijojnë të mbeten në qendër të vëmendjes ndërkombëtare.