Ministrja për Evropën dhe Punët e Jashtme, Elisa Spiropali, ka uruar sot 18-vjetorin e shpalljes së Pavarësisë së Kosovës, duke theksuar se kjo ditë kujton sakrificën dhe vendosmërinë e popullit të Kosovës për të jetuar i lirë. Spiropali vuri në dukje se, pavarësisht rrugës së vështirë, Kosova ka arritur të krijojë një shtet të konsoliduar dhe një realitet të pakthyeshëm.
“Ajo që kemi sot është një Kosovë me institucione të forta, me demokraci në zhvillim dhe një orientim të qartë euroatlantik,” tha Spiropali, duke theksuar se vendi vazhdon të ecë përpara me besim dhe përgjegjësi në çdo hap.
Në përvjetorin e Pavarësisë, Spiropali theksoi se Shqipëria do të vazhdojë të qëndrojë pranë Kosovës si motër dhe aleate, duke ofruar mbështetje të plotë për sigurinë, zhvillimin dhe të ardhmen e përbashkët evropiane. Ajo uroi gjithashtu qytetarët e Kosovës dhe të gjithë ata që kontribuan për arritjen e këtij momenti historik: “Urime nga zemra për qytetarët e Kosovës dhe për të gjithë ata që e bënë të mundur këtë ditë. Gëzuar Pavarësinë!”