Kreu i Partisë Demokratike, Sali Berisha, gjatë një konference për mediat më 24 shkurt deklaroi se kryeministri Edi Rama është “kreu i korrupsionit në Shqipëri” dhe kërkoi dorëheqjen e tij.
Berisha theksoi se, sipas tij, Ramën nuk do ta heqë nga pushteti drejtësia apo komuniteti ndërkombëtar, por vetëm populli shqiptar. Ai përmendi ndërhyrjet dhe investimet e qeverisë, duke e akuzuar për ndërtime të kostos së lartë dhe afera të dyshimta financiare, përfshirë projektin e Porto Romanos dhe AKSHI.
“Rama duhet të shkarkohet. Revolta ndaj tij po arrin nivele të larta dhe ai do të ketë fatin e kultit të Hoxhës,” deklaroi Berisha, duke paralajmëruar se veprimet e kryeministrit kanë rrezikuar edhe procesin e integrimit të Shqipërisë në Bashkimin Europian.
Ai shtoi se Rama është i gatshëm të sakrifikojë interesin e vendit për ruajtjen e pozicionit të tij politik dhe e përshkroi si të damkosur nga komuniteti ndërkombëtar për sjelljen e tij në forumet ndërkombëtare.