Ministri i Mbrojtjes, Pirro Vengu, njofto se po përgatitet një paketë për kompensimin e dëmeve në bujqësi dhe blegtori, të shkaktuara nga përmbytjet e muajve të fundit.
Në një konferencë për shtyp mbi ngritjen e kapaciteteve të Forcës së Armatosur, emergjencave civile dhe industrisë ushtarake, Vengu tha se Agjencia Kombëtare e Mbrojtjes Civile ka mbështetur Ministrinë e Bujqësisë dhe bashkitë në trajtimin e dëmeve dhe tani po përgatitet bashkë me Ministrinë e Financave një paketë kompenimi. Ai theksoi se fondet për pasojat nga zjarret dhe dëmet në banesa janë alokuar dhe shpërndarë nga bashkitë.
Ministri u ndal edhe tek situata e reshjeve intensive në nëntor, janar dhe shkurt, që krijuan problematika në shumicën e baseneve lumore dhe zonat ujëmbledhëse. Ai shtoi se nën koordinimin e AKMC-së dhe Forcave të Armatosura, veçanërisht komandat mbështetëse të Emergjencave Civile dhe repartet xheniere, kanë qenë dhe vazhdojnë të jenë të angazhuara në terren.
“Është kryer edhe operacioni i kërkim-shpëtimit në Klos bashkë me Forcat e Kosovës dhe misioni vijon në basenin e Osumit, me angazhim maksimal,” tha Vengu.
Ai theksoi gjithashtu se forcat xheniere kanë punuar në hapjen e akseve të bllokuara nga rrëshqitjet dhe në rehabilitimin e infrastrukturës kritike, për të siguruar banorët e zonave të prekura dhe për të ruajtur sigurinë në të gjithë vendin.