Presidentja e Kosovës, Vjosa Osmani, priti sot të ngarkuarën me punë të Shteteve të Bashkuara të Amerikës në Kosovë, Anu Prattipati. Gjatë takimit u diskutua për vizitën e fundit të Osmanit në SHBA, takimet me zyrtarë të administratës amerikane dhe çështje të përbashkëta me interes strategjik.
Osmani shprehu mirënjohje për ftesën e Presidentit Donald Trump që Kosova të jetë shtet bashkëthemelues i Bordit të Paqes dhe për garancitë për stabilitet në rajon. Ajo ritheksoi përkushtimin e Kosovës ndaj partneritetit strategjik me SHBA-të, duke përfshirë sigurinë rajonale, diplomacinë, ekonominë dhe mbrojtjen.
“Prania ushtarake amerikane dhe e aleatëve në kuadër të NATO-s mbetet një faktor kyç për stabilitetin, ndërsa anëtarësimi i Kosovës në NATO vazhdon të jetë objektiv strategjik për paqe afatgjatë,” theksoi Osmani.
Në takimin u diskutua edhe rëndësia e vijimit të dialogut strategjik bilateral dhe përmbyllja e proceseve kushtetuese për konsolidimin e institucioneve, në funksion të zhvillimit demokratik dhe adresimit të nevojave të qytetarëve.
Presidentja vuri në dukje përmirësimet e dukshme në fushën e sigurisë dhe sundimit të ligjit në veri të vendit, të reflektuara në raportet e Policisë së Kosovës për vitin 2025, duke konfirmuar një situatë më të qetë dhe të sigurt për qytetarët në atë rajon.