Komisioni i Posaçëm Parlamentar për Reformën Zgjedhore, me mbështetjen e OSBE-së, zhvilloi sot një tryezë konsultimi për projektligjin e ri mbi financimin e partive politike. Diskutimi u fokusua tek krijimi i një sistemi të qëndrueshëm, që garanton transparencë, parandalon korrupsionin dhe mbron pluralizmin në vend.
Bashkëkryetari i Komisionit, Oerd Bylykbashi, theksoi se funksionimi i partive politike është po aq i rëndësishëm sa transparenca e financimit të tyre. Ai nënvizoi se ligji i ri duhet të ofrojë mbrojtje për partitë, duke siguruar fonde të mjaftueshme dhe duke shmangur ndikime të paligjshme ose presione të jashtme.
“Ky projektligj duhet të krijojë një ekuilibër mes transparencës dhe funksionimit normal të partive, duke mbrojtur pluralizmin dhe duke u garantuar qytetarëve një proces politik të ndershëm,” tha Bylykbashi.
Ai shtoi se ligji nuk duhet të jetë pengesë për partitë e vogla, por duhet të garantojë që të gjitha partitë, qofshin ato parlamentare apo jashtë parlamentit, të kenë mundësi të funksionojnë demokratikisht dhe të jenë të mbrojtura nga mekanizmat kontrollues që mund të përdoren në mënyrë represive.
Bylykbashi përfundoi duke nënvizuar se reforma e financimit politik është një hap kyç për konsolidimin e demokracisë shqiptare dhe një përgjigje ndaj rekomandimeve të raportit të ODIHR për zgjedhjet e mëparshme.