5 të arrestuar për zjarrvënie, Balla: Mund të dënoheni deri në 15 vite

Pesë persona janë arrestuar dhe katër të tjerë janë proceduar penalisht nga policia gjatë 24 orëve të fundit pasi akuzohen për zjarrvënie të qëllimshme.

Ministri i Brendshëm, Taulant Balla ka njoftuar nëpërmjet llogarisë së tij në Facebook se të arrestuarit dhe të proceduarit kanë gishtë në vënien e zjarrit me qëllim.

Gjithashtu, Balla  bën me dije se po vijojnë kryerjet e veprimeve proceduriale dhe këqyrjes në vendngjarje të zjarreve dhe dokumentimin e dëmeve të shkaktuara në mjedis, pronë private dhe publike apo rrezikimin e jetës së banorëve.

Ai thekson se zjarrënia e qëllimshme është vepër e rëndë penale dhe dënohet deri në 15 vite burg.

“Zjarret në vend Gjatë 24 orëve të fundit Policia e Shtetit ka arrestuar 5 persona dhe ka proceduar 4 të tjerë, të përfshirë në zjarrvënie.

Gjithashtu po vijon me kryerjen e veprimeve proceduriale dhe këqyrjes në vendngjarje të zjarreve dhe dokumentimin e dëmeve të shkaktuara mjedisore, pronës private dhe publike dhe rrezikimit të jetës së banorëve.

Është vepër e rëndë penale zjarrvënia me dënime që shkojnë deri në 15 vite heqje lirie!”, shkroi Balla.