Presidenti i Shqipërisë, Bajram Begaj, ka përcjellë një mesazh urimi me rastin e 18-vjetorit të Pavarësisë së Kosovës, duke theksuar përparimin e shtetit më të ri në Evropë në forcimin e institucioneve dhe në rritjen e njohjeve ndërkombëtare.
Në mesazhin e tij, Kreu i Shtetit vlerëson se Kosova shënon këtë përvjetor më e qëndrueshme politikisht dhe me institucione demokratike të konsoliduara. Ai shprehu nderim dhe mirënjohje për të gjithë ata që kontribuuan në arritjen e lirisë dhe pavarësisë së vendit.
Begaj vuri në dukje edhe rolin e partnerëve ndërkombëtarë, duke falënderuar Shtetet e Bashkuara të Amerikës dhe vendet e bashkësisë perëndimore për mbështetjen e vazhdueshme ndaj sovranitetit dhe integritetit territorial të Kosovës.
Në përmbyllje të mesazhit, presidenti shqiptar theksoi rëndësinë e rrugëtimit të përbashkët drejt integrimit evropian, duke bërë thirrje për unitet dhe bashkëpunim më të ngushtë.
Urimi i tij përkon me vizitën zyrtare që ai po zhvillon këtë të hënë në Kosovë, në kuadër të aktiviteteve për shënimin e 18-vjetorit të shpalljes së pavarësisë.