Angli: Sunak drejt postit të Kryeministrit

Rishi Sunak po ecën me hapa gati të sigurt drejt postit të Kryeministrit të Britanisë së Madhe. Të paktën deri më tani kur ka siguruar 172 firma mbështetjeje nga deputetët e grupit konservator me 357 përfaqësues.

Ndërsa rivalja e tij, Peni Mordant ka siguruar vetëm 25 firma nga të paktën 100 të nevojshme për të qenë kandidate për kryeministre.

Një avantazh më shumë për Rishi Sunakun është edhe tërheqja e ish-Kryeministrit Boris Johnson nga gara mëngjesin e kësaj të hëne, pasi kishte mbledhur vetëm 54 firma.

Ai u përball me thirrje të shumta për t’u tërhequr për të mos e zgjatur garën kryeministrore, teksa vendi ka nevojë për vendimmarrje urgjente, për menaxhimin e krizës më të rëndë energjetike që prej Luftës së Dytë Botërore.

Tashmë shumë deputetë që mbështesnin Johnson janë renditur në krah të Rishi Sunakut, ndër të cilët edhe ministri aktual i Financave Xheremi Hant e ish-ministrja e Brendshme Priti Patel.

Gara për kandidaturat mbyllet rreth orës 14:00 me orën lokale. Me shumë gjasa Sunak do të jetë kandidati i vetëm dhe brenda ditës mund të zgjidhet Kryeministër.