Balla: Policia ka nevojë për ndryshim

Ministri i Brendshëm, Taulant Balla ka zhvilluar një takim me strukturat e Drejtorisë Vendore të Policisë së Gjirokastrës këtë të diele.

Ai ka kërkuar që  Policia dhe agjencitë e tjera ligjzbatuese kanë nevojë për disa ndryshime në vizionin dhe misionin e tyre. Balla shprehet se policia duhet të jetë vetëkorrigjuese dhe të perceptohet vetëm si simbol i ligjshmërisë.

Ministri ka shtuar se këto përmirësime në vizionin dhe misionin e Policisë nuk realizohen vetëm me kërkesin e tij por kërkojnë mbështetje ligjore dhe puna për këtë do të fillojë.

Postimi i Taulant Ballës

Siç e kam bërë të ditur gjatë kontakteve të mia të para me drejtues të Policisë së Shtetit, përfaqësues të institucioneve, por edhe me qytetarë në të gjithë territorin e vendit, Policia dhe agjencitë e tjera ligjzbatuese kanë nevojë për disa ndryshime në vizionin dhe misionin e tyre.

Kam konstatuar se publiku dhe qytetarët i kanë mirëpritur këto qasje të reja në raportet e Policisë me ligjin dhe qytetarët.

Duhet t’u japim më shumë prioritet komunikimit, bashkëpunimit e partneritetit me qytetarët dhe funksioneve edukuese të Policisë dhe agjencive ligjzbatuese.

Eficienca e punës së Policisë nuk varet nga forca e policit, por nga forca e ligjit.

Policia duhet të jetë më shumë vetëkorrigjuese dhe duhet të jetë dhe të perceptohet vetëm dhe vetëm si simbol i ligjshmërisë. Polici duhet të jetë një model, një referencë për qytetarët.

Në çdo rast shkelja e ligjit ka pasoja të rënda për shoqërinë, por kur ligjet shkelen nga policët, pasojat janë shumëfish më të rënda. Kjo trondit besimin publik jo thjesht te Policia, por te shteti dhe ligji.

Por këto përmirësime në vizionin dhe misionin e Policisë nuk realizohet thjesht sepse i kërkoj unë apo i mbështesin qytetarët. Ato kërkojnë edhe një mbështetje ligjore dhe ne do të fillojmë të punojmë për këtë.

Gjatë takimit me strukturat e Drejtorisë Vendore të Policisë së Gjirokastrës.