Balla takim me ambasadorin e ri gjerman: Trajnimi i Policisë Rrugore sipas standardeve gjermane, prioritet ynë kryesor

Ministri i Brendshëm Taulant Balla  zhvilloi sot një takim me ambasadorin e ri gjerman në Tiranë Karl Bergner.

Gjatë këtij takimi Balla dhe Bergner diskutuan në lidhje me mundësinë për krijimin e mekanizmave të rinj për promovimin e njerëzve me integritet të lartë moral dhe profesional brenda strukturës së Policisë së Shtetit.

Sipas ministrit një ndër sektorët prioritarë është rifreskimi, trajnimi dhe modernizimi sipas standardeve gjermane i policisë së qarkullimit rrugor.

“Mirëprita në një takim Ambasadorin e ri gjerman në Tiranë Karl Bergner. Ndërsa brenda strukturës së Policisë së Shtetit po synojmë të krijojmë mekanizma të rinj për promovimin e njerëzve me integritet të lartë moral dhe profesional, ekspertiza gjermane në këtë drejtim do të jetë mjaft e rëndësishme.

Një ndër sektorët prioritarë për ne është rifreskimi, trajnimi dhe modernizimi sipas standardeve gjermane i policisë së qarkullimit rrugor. Do të vazhdojmë të kryejmë operacione të përbashkëta hetimore në luftën kundër veprave penale për narkotikët, trafiqet e paligjshme, pastrim parash, krimin ekonomik e financiar, krimin kompjuterik.

Task-Forca e përhershme mes dy policive tona “Anti-Skifter” do të vijojë të japë rezultate në goditjen e elementëve keqbërës, me çeljen dhe ndjekjen e procedimeve penale paralele.”-shkruan Balla.