KFOR rrit prezencën në Veri: Sundimi i ligjit është ekskluzivitet i Policisë së Kosovës

Misioni i KFOR-it ka folur për mediat lidhur me deklaratat për të marrë nën kontroll Verin e Kosovës, pas sulmit terrorist një 10 ditë më parë, ku mbeti i vrarë, efektivi i policisë Afrim Bunjaku.

KFOR bën me dije se kanë shtuar praninë dhe aktivitetin në Veri, por bëjnë apel që palët të përmbahen nga retorika nxitëse.

“Trupat janë tërhequr nga rezerva strategjike e NATO-s për Ballkanin Perëndimor. Mbretëria e Bashkuar po vendos rreth 200 ushtarë nga Batalioni i Parë i Regjimentit Mbretëror të Princeshës së Uellsit për t’iu bashkuar një kontingjenti prej 400 trupash të Mbretërisë së Bashkuar që tashmë po ushtrohet në Kosovë, dhe përforcime të mëtejshme do të pasojnë nga aleatët e tjerë. FOR-i do të vazhdojë të veprojë në mënyrë të paanshme për të mirën e sigurisë në Kosovë dhe në rajon. KFOR-i do të vazhdojë të rregullojë qëndrimin e tij, sipas nevojës“, njofton KFOR.

KFOR ka bërë të ditur se mandati i tyre s’përfshinë zbatimin e ligjit dhe se kjo mbetet një kompetencë ekskluzive e Policisë së Kosovës.

“Mandati i KFOR-it në OKB është i qartë dhe nuk përfshin zbatimin e ligjit. Kjo mbetet një prerogativë ekskluzive e Policisë së Kosovës“, thekson KFOR.

Misioni i KFOR bën thirrje që Kosova dhe Serbia të riangazhohen në dialogun e lehtësuar nga BE-ja, si mënyra e vetme për të arritur paqe.

“Ne i bëjmë thirrje Beogradit dhe Prishtinës që të riangazhohen në dialogun e lehtësuar nga BE-ja, i cili është mënyra e vetme për të arritur paqen dhe stabilitetin e qëndrueshëm për të gjitha komunitetet. Të gjitha palët duhet gjithashtu të përmbahen nga retorika nxitëse, e cila është kundërproduktive dhe rrezikon përkeqësimin e mëtejshëm të tensioneve“, përfundon KFOR-i.

Burimi: NEWSBOMB