Lajçak: Bisedimet e kësaj jave për rrugën e deeskalimit në veri të Kosovës ishin konstruktive

I dërguari i posaçëm i BE-së për dialogun Beograd-Prishtinë, Miroslav Lajçak, i ka quajtur si konstruktive takimet e kësaj jave që zhvilloi me presidentin e Serbisë, Aleksandar Vuçiç dhe kryeministrin e Kosovës, Albin Kurti.

“Kemi pasur diskutime të gjata dhe konstruktive për situatën aktuale në veri të Kosovës dhe rrugën e deeskalimit, në përputhje me deklaratën e BE-së nga 3 qershori dhe zbatimin e të gjitha marrëveshjeve nga dialogu”, ka thënë Lajçak me anë të një postimi në rrjetet sociale.

Kujtojmë që Lajçak u takua me Kurtin në Korfuz, ku ishin pjesëmmarrës në impoziumin e 25-të Ndërkombëtar në Greqi. Po ashtu Lajçak gjatë javës që lamë pas u takua ndaras dhe me kryenegociatorin kosovar Besnik Bislimi dhe atë serb Petar Petkoviq, në Bruksel.

Kryenegociatori i Kosovës, Besnik Bislimi, pas takimit me Lajçak tha se është parë nevoja që të punohet edhe më tej në konkretizimin e disa dokumenteve që janë të rëndësishme për të siguruar një zbatim të plotë të Marrëveshjes Bazike.