Policia ndihmon 28 persona në anijen turistike dhe dy finlandezë me kanoe në Vlorë, babai dhe djali shpëtojnë mrekullisht në Durrës

Policia u ka shkuar në ndihmë disa shtetasve që kanë rrezikuar të mbyten në det këtë të shtunë, në Karaburun, Spille dhe Durrës.

Bëhet me dije se mesditën e sotme, një shtetase ka telefonuar për ndihm,ë pasi anija turistike me të cilën ajo po udhëtonte bashkë me 27 persona të tjerë, pësoi defekt në zonën e Karaburunit.

Disa minuta më pas, 2 turistë nga Finlanda kanë kërkuar ndihmë pasi kishin humbur kontrollin e kanoes së tyre për shkak të dallgëve në zonën e quajtur “Shpella e Piratëve’.

Menjëherë, Policia Kufitare e vlorës është nisur me ekipe shpëtimi, ku më pas është bërë i mundur nxjerrja në breg e anijes turistike me 28 pasagjerë dhe kanoes së dy turistëve finlandezë.

Gjithashtu, Policia Kufitare e Durrësit ka shpëtuar bashkë me rojen e plazhit në Spille, një 44-vjeçar bashkë me djalin e tij 9-vjeç të cilët rrezikuan të mbyteshin.Të gjithë shtetasit që rrezikuan që mbyteshin në det, aktualisht ndodhen në gjendje të mirë shëndetësore.

Njoftimi i Policisë

Policia Kufitare

Shërbimet e Policisë Kufitare në Vlorë dhe në Durrës iu shkojnë në ndihmë në 3 raste, disa shtetasve që rrezikuan të mbyteshin në det.

-Mesditën e sotme, një shtetase ka telefonuar për të kërkuar ndihmë, pasi anija turistike me të cilën ajo po lundronte bashkë me 27 shtetas të tjerë, kishte pësuar defekt, në zonën e Karaburunit.

Disa minuta më pas, 2 shtetas finlandez kanë kërkuar ndihmën e Policisë, pasi në zonën e quajtur “Shpella e Piratëve”, kishin humbur kontrollin e mjetit lundrues kanoe, për shkak të dallgëve, dhe e kishin të pamundur kthimin në breg.

Menjëherë, dy skuadra të Policisë Kufitare Vlorë janë nisur bashkë me mjetet lundruese të Policisë Kufitare, në vendet ku kishin ngelur në det dy mjetet lundruese.

Ndërhyrja e shpejtë e shërbimeve të Policisë Kufitare ka bërë të mundur lokalizimin dhe nxjerrjen në breg të mjetit lundrues anije turistike me 28 pasagjerë në bord dhe të mjetit lundrues kanoe me të cilin lundronin dy shtetasit finlandezë.

-Gjithashtu, në plazhin e Spillesë, shërbimet e Policisë Kufitare Durrës, bashkë me rojën e plazhit, kanë shpëtuar 2 shtetas që rrezikuan të mbyteshin ndërkohë që po laheshin në det. 44-vjeçari dhe djali i tij 9 vjeç u nxorrën në breg dhe iu dha ndihma e parë.

Të gjithë shtetasit që rrezikuan që mbyteshin në det, aktualisht ndodhen në gjendje të mirë shëndetësore. Ata kanë falënderuar punonjësit e Policisë Kufitare, që i shkuan në ndihmë në kohë rekord.