Sali Berisha dhe koalicioni “Bashkë Fitojmë” hapin sot zyrtarisht fushatën zgjedhore, në stadiumin “Air Albania”

Partia Demokratike dhe koalicioni opozitar “Bashkë Fitojmë” çelin fushatën elektorale këtë të 15 prill në orën 12.00, në stadiumin kombëtar “Air Albania”. Me sloganin “Ndryshimi në duart e tua” opozita do të nisë zyrtarisht rrugëtimin drejt 14 majit.

Në videon e spotit bëhet një retrospektivë se si mbërriti PD e rithemeluar deri këtu. Pikënisja e këtij rrugëtimi është 16 shtatori i 2021, kur kryetari i PD, Sali Berisha nisi Foltoret me qytetarët.

Momenti i dytë madhor ishte Kuvendi i 11 dhjetorit, ku zbriti në stadium “formacioni i lirisë”, me miratimin e ndryshimeve statutore të PD ku u shkarkua Lulzim Basha dhe u bënë pjesë e statutit primaret.

Ndërsa në 6 mars 2022, shqiptarët i besuan rithemelimit me votë, në zgjedhjet e pjesshme vendore. Momenti kulminant i rithemelimit të Partisë Demokratike do të ishte 22 maji i vitit të kaluar kur lideri historik, Sali Berisha u zgjodh në krye të PD.

Mesazhet e spotit të PD:

• Ejani të shtunën, 15 prill 2023 ora 12:00 në stadium!
• Rikthehemi në ‘Arenë’, aty ku nisi Rithemelimi!
• Më të fortë për mbrojtjen e pluralizmit e demokracisë!
• Më të hapur me kandidatët e dalë nga vota juaj!
• Më të bashkuar të gjithë ata që nuk janë marrë peng nga pushteti!
• Ndryshimi në duart e tua!
• #BashkëFitojmë