Twitter kufizon përdoruesit, mund të shikojnë vetëm 500 postime në ditë

Twitter ka kufizuar se sa postime mund të shikojë një përdorues në 24 orë. Sipas CEO Elon Musk, kjo është një përpjekje për të ulur nivelet e grumbullimit të të dhënave dhe manipulimit të sistemit.

Kufizimet të cilat u njoftuan këtë të premte nga Musk, filluan të kenë efekte ditën e shtunë, duke bërë që më shumë se 7,500 njerëz të raportojnë probleme duke përdorur shërbimin e mediave sociale.

Musk, i cili bleu Twitter për 44 miliardë dollarë vitin e kaluar, fillimisht tha se llogaritë e verifikuara do të kufizohen në leximin e 6,000 postimeve në ditë, ndërsa llogaritë e paverifikuara do të kufizohen në 600 postime në ditë.

Ai rriti më vonë kufizimin e përkohshëm të leximit në 10,000 postime në ditë për përdoruesit e verifikuar, 1,000 postime në ditë për të paverifikuar dhe 500 postime në ditë për përdoruesit e rinj të paverifikuar.

Elon Musk shkroi në një postim në Twitter të premten se të dhënat e kompanisë po vidhen nga Inteligjenca Artificiale.

Ai kishte shprehur më herët pakënaqësi me firmat e inteligjencës artificiale si OpenAI, pronari i ChatGPT, për përdorimin e të dhënave të Twitter për të trajnuar modelet e tyre të mëdha gjuhësore.