Këngëtari Ermal Meta preku zemrat e publikut të Festivalit të Sanremos 2026 me performancën e këngës “Stella stellina”, një krijim i frymëzuar nga ninana tradicionale italiane dhe i dedikuar fëmijëve të prekur nga konflikti në Palestinë.
Meta, që solli këngën si një reflektim mbi pafajësinë e fëmijëve në kohë lufte, u ngjit në skenë me emrin e një vajze palestineze – Amal – të shkruar në jakën e këmishës. Ai bëri të ditur se do ta përsërisë këtë gjest simbolik çdo natë, duke mbajtur emra të tjerë të zakonshëm palestinezë.
“Protagonistja e ‘Stella stellina’ është një fëmijë pa emër, por ndoshta i ka të gjitha emrat. Aysha, Amal, Layla, Nour, Hind… ç’rëndësi ka? Ndoshta gjithçka, ndoshta asgjë. Fëmijë të askujt, fëmijë të të gjithëve,” shkroi Meta në rrjetet sociale pas performancës, duke theksuar mesazhin njerëzor të këngës.
Gjatë interpretimit, artisti krijoi një atmosferë të përmbajtur dhe emocionalisht të thellë, ndërsa publiku e priti me reflektim dhe duartrokitje.
Mbrëmja e parë e Sanremos 2026 nisi me prezantimin live të tridhjetë artistëve në garë, të cilët interpretuan për herë të parë këngët e tyre të papublikuara. Festivali mbetet një nga ngjarjet më të ndjekura muzikore në Itali dhe ofron mundësinë për fituesin të përfaqësojë vendin në Eurovision Song Contest.