Prokurorët në Libi kanë nisur hetimet lidhur me vrasjen e Saif al-Islam Gaddafit, djalit të ish-diktatorit libian, Muammar Gaddafi, i cili u vra në një përplasje me armatosur në qytetin Zintan. Sipas një deklarate të zyrtarëve libianë, Saif al-Islam, 53 vjeç, u qëllua për vdekje gjatë një “përplasjeje të drejtpërdrejtë” me katër persona të paidentifikuar, të cilët hynë me forcë në banesën e tij. Ata dyshohet se e qëlluan me armë, duke i shkaktuar plagë të rënda që i morën jetën.
Megjithatë, ka pasur disa versione të ngjarjes. Motra e Saif al-Islamit deklaroi për mediat libiane se ai kishte vdekur afër kufirit të Libisë me Algjerinë. Nga ana tjetër, avokati i tij i tha agjencisë AFP se një “njësi komando prej katër personash” ishte përgjegjëse për atentatin në banesën e tij në Zintan, por pa dhënë detaje të tjera mbi identitetin e autorëve ose motivet e mundshme të sulmit.
Zyra e Prokurorit të Përgjithshëm të Libisë njoftoi se një ekip ekspertësh të mjekësisë ligjore është dërguar në Zintan për të kryer hetime të mëtejshme dhe për të sqaruar rrethanat e vdekjes së Saif al-Islamit.
Saif al-Islam Gaddafi ka qenë për një kohë të gjatë një figurë kyçe në politikën libiane dhe konsiderohej si pasardhësi më i mundshëm i të atit, i cili udhëhoqi vendin për më shumë se katër dekada deri në rrëzimin e tij gjatë kryengritjes së vitit 2011. Saif al-Islam kishte mbetur një simbol i rezistencës së regjimit të dikurshëm, duke tërhequr vëmendjen e medieve dhe komunitetit ndërkombëtar.
Për redaktorin e BBC-së për Çështje Botërore, John Simpson, i cili kishte intervistuar Saif al-Islamin gjatë revolucionit të vitit 2011, ai ishte një figurë interesante, e çuditshme dhe e paqëndrueshme. Simpson e përshkroi atë si “shumë më pak ekscentrik se i ati”, por gjithsesi me një sjellje të papritur. Gjatë intervistës së vitit 2011, Saif al-Islam kishte shpërthyer në fyerje ndaj Simpson dhe ekipit të BBC-së përpara zyrtarëve të tij, por më pas u kishte kërkuar ndjesë, duke thënë: “Kështu e presin prej meje.”
Vrasja e tij ka krijuar një vakum të madh politik në Libinë e pas-revolucionit dhe ka shtuar tensionet në një vend që ende po përballet me pasojat e një konflikti të vazhdueshëm për pushtet dhe kontroll.