Shqipëria do të prezantojë produktet e saj organike në panairin ndërkombëtar BIOFACH 2026, i cili do të zhvillohet nga 10 deri më 13 shkurt në Nuremberg të Gjermanisë. Pesë kompani shqiptare do të jenë pjesë e pavijonit kombëtar, duke ekspozuar fruta, perime, vaj ulliri dhe produkte të tjera bio, të certifikuara sipas standardeve ndërkombëtare.
Agjencia Shqiptare për Investime dhe Zhvillim (AIDA) bën të ditur se pjesëmarrja e Shqipërisë në këtë panair ka rëndësi strategjike, pasi shërben për të promovuar cilësinë e produkteve organike “Made in Albania” dhe për të krijuar mundësi konkrete për zgjerimin e tyre në tregjet ndërkombëtare.
Sipas AIDA-s, prezantimi në BIOFACH synon të forcojë imazhin e Shqipërisë si eksportuese e produkteve të qëndrueshme dhe organike, të nxisë rritjen e eksporteve dhe të hapë rrugë për bashkëpunime të reja me partnerë globalë në sektorin agro-ushqimor.
BIOFACH konsiderohet një nga panairet më prestigjioze ndërkombëtare për industrinë organike dhe pjesëmarrja e Shqipërisë reflekton vlerësimin gjithnjë e më të madh të produktit shqiptar në tregjet evropiane dhe globale. Ky aktivitet është pjesë e strategjisë kombëtare për zhvillimin e bizneseve organike dhe promovimin e eksporteve “Made in Albania”, duke kontribuar drejtpërdrejt në rritjen e konkurrueshmërisë së sektorit agro-ushqimor.
Aktualisht, produktet bujqësore shqiptare eksportohen në rreth 85 tregje ndërkombëtare, përfshirë vendet e Bashkimit Evropian, SHBA-në, Zvicrën, Lindjen e Mesme dhe disa vende të Azisë. Në mesin e produkteve kryesore janë frutat dhe perimet e freskëta, si shegë, mollë, agrume, domate dhe speca, produktet e përpunuara, vaj ulliri, vera, pije tradicionale, si edhe produktet bio, për të cilat kërkesa ndërkombëtare është në rritje.
Në dy deri tre vitet e fundit, eksportet bujqësore shqiptare kanë shënuar një rritje të qëndrueshme prej mbi 10–15 për qind në vit, falë modernizimit të sektorit, certifikimeve ndërkombëtare dhe përmirësimit të standardeve higjieno-sanitare. Autoritetet theksojnë se përdorimi dhe promovimi i markës “Made in Albania”, së bashku me investimet në branding dhe certifikim organik, janë hapa kyç për rritjen e vlerës dhe besueshmërisë së produkteve shqiptare në tregjet globale.