Presidenti i Shteteve të Bashkuara, Donald Trump, do të presë këtë të mërkurë, më 11 shkurt, në Shtëpinë e Bardhë kryeministrin izraelit Benjamin Netanyahu, në një moment delikat për zhvillimet në Lindjen e Mesme dhe për negociatat mbi programin bërthamor të Iranit.
Takimi zhvillohet në një kohë kur bisedimet mes fuqive perëndimore dhe Teheranit kanë hyrë në një fazë vendimtare. Netanyahu pritet të kërkojë që çdo marrëveshje e mundshme të përfshijë ndalimin e pasurimit të uraniumit nga Irani, si dhe kufizimin e mbështetjes së tij për grupet e armatosura si Hamasi dhe Hezbollah. Para nisjes drejt SHBA-së, ai theksoi se do t’i paraqesë presidentit amerikan qëndrimet e Izraelit mbi parimet bazë të negociatave.
Nga ana tjetër, Irani ka deklaruar se nuk do të heqë dorë nga pasurimi i uraniumit pa një lehtësim të ndjeshëm të sanksioneve ekonomike, të cilat kanë rënduar ekonominë e vendit. Teherani kërkon garanci për heqjen e presionit ekonomik në këmbim të kufizimeve në programin bërthamor.
Kjo është vizita e gjashtë e Netanyahut në SHBA që nga rikthimi i Trump në presidencë, më shumë se çdo lider tjetër, duke reflektuar marrëdhënien e afërt mes dy drejtuesve. Netanyahu e ka cilësuar vazhdimisht Iranin si kërcënim për sigurinë e Izraelit dhe ka kërkuar masa të ashpra për të frenuar ndikimin e tij në rajon.
Ndërkohë, Shtëpia e Bardhë ka shtuar praninë ushtarake në Lindjen e Mesme. Presidenti Trump ka paralajmëruar se SHBA mund të ndërmarrë veprime nëse Irani refuzon një marrëveshje, duke mos përjashtuar dërgimin e një grupi të dytë aeroplanmbajtësesh në rajon. Muajin e kaluar, aeroplanmbajtësja USS Abraham Lincoln u dislokua në zonë, pas paralajmërimeve për mundësi sulmesh ndaj Iranit.
Megjithatë, presidenti amerikan ka theksuar se mbetet i hapur për një zgjidhje diplomatike, duke deklaruar se Irani “dëshiron shumë të arrijë një marrëveshje”.
Zyrtarë izraelitë kanë bërë të qartë se Izraeli rezervon të drejtën për veprim ushtarak nëse nuk arrihet një marrëveshje që garanton sigurinë e vendit. Brenda qeverisë izraelite ka presion për një qasje sa më të ashpër ndaj Iranit, duke shfrytëzuar raportin e ngushtë me administratën Trump.
Sipas ekspertëve, ekziston shqetësimi se një marrëveshje e përshpejtuar mund të mos adresojë plotësisht programin raketor të Iranit dhe mbështetjen e tij për grupet e armatosura në rajon. Ata theksojnë se aktualisht SHBA dhe Izraeli e shohin veten në një pozicion më të favorshëm negociues, ndërsa Irani përballet me presione të brendshme dhe ndërkombëtare.