Një tjetër sinjal politik jo i favorshëm për Donald Trump vjen në prag të zgjedhjeve të mesmandatit në nëntor. Këtë herë, përplasja ka ndodhur në Dhomën e Përfaqësuesve, ku gjashtë deputetë republikanë iu bashkuan demokratëve për të miratuar një projektligj që bllokon vendosjen e tarifave të reja doganore ndaj Kanadasë.
Projektligji u miratua me 219 vota pro dhe 211 kundër, duke i dhënë një goditje të drejtpërdrejtë presidentit, pasi shumica republikane nuk arriti të mbajë të bashkuar radhët në një çështje kyçe të politikës tregtare.
Rezultati i votimit konsiderohet një sinjal i qartë i tensioneve brenda Partisë Republikane dhe një tregues se mbështetja për Trump nuk është më e pakushtëzuar, as në Kongres. Përveç sfidës institucionale, zhvillimi pasqyron edhe një klimë më të gjerë pakënaqësie në opinionin publik.
Sondazhe të fundit nga Gallup, “approval tracker” i revistës The Economist, Reuters/Ipsos dhe Real Clear Politics tregojnë një rënie, në nivele të ndryshme, të mbështetjes për punën e administratës së Shtëpisë së Bardhë.
Menjëherë pas votimit, Trump reagoi ashpër, duke paralajmëruar se republikanët që kundërshtojnë politikat e tij për tarifat “do të përballen me pasoja në zgjedhje”, përfshirë edhe në garat paraprake brenda partisë, të njohura si “primare”.
Zhvillimi pritet të ndikojë në debatin e brendshëm republikan dhe të shtojë presionin politik mbi presidentin në muajt që paraprijnë zgjedhjet e mesmandatit.