Konferenca e Sigurisë së Mynihut konfirmoi edhe këtë vit statusin e saj si një nga platformat më të rëndësishme globale për debatin mbi sigurinë dhe të ardhmen e rendit euroatlantik, duke mbledhur liderë politikë, ekspertë dhe përfaqësues të organizatave ndërkombëtare.
Në këtë kuadër, ministri i Mbrojtjes Pirro Vengu zhvilloi një seri takimesh dypalëshe me homologë nga vende aleate dhe partnere. Diskutimet u përqendruan në thellimin e bashkëpunimit strategjik, rritjen e ndërveprueshmërisë ushtarake dhe adresimin e kërcënimeve të përbashkëta ndaj sigurisë.
Gjatë bisedimeve u theksua rëndësia e unitetit dhe koordinimit në kuadër të mbrojtjes kolektive, si edhe angazhimi i Shqipërisë për të kontribuar aktivisht në misionet dhe nismat e përbashkëta të sigurisë.
Ministri Vengu mori pjesë gjithashtu në tryeza me drejtues të kompanive ndërkombëtare të industrisë së mbrojtjes dhe inovacionit, ku u diskutuan mundësitë për bashkëpunim konkret dhe për zhvillimin e mëtejshëm të kapaciteteve të industrisë ushtarake në vend.
Pjesëmarrja në këtë forum u konsiderua si një mundësi e rëndësishme për promovimin e interesave kombëtare dhe për konsolidimin e rolit të Shqipërisë si partner i besueshëm në arkitekturën e sigurisë evropiane.