Evropa duhet të përgatitet për një ngrohje globale që mund të arrijë deri në 3°C deri në vitin 2100, paralajmëron Bordit Këshillimor Shkencor të Bashkimit Evropian për Ndryshimet Klimatike (ESABCC), duke theksuar se përpjekjet aktuale për t’u përshtatur me ndryshimet klimatike janë ende të pamjaftueshme. Maarten van Aalst, anëtar i bordit dhe ekspert i njohur i klimës, deklaroi se përballja me këtë sfidë nuk është aq e ndërlikuar siç mund të mendohet, duke theksuar se “nuk është shkencë raketash”.
Van Aalst, që gjithashtu drejton Institutin Meteorologjik të Holandës (KNMI), e ka vlerësuar si “sfiduese, por të realizueshme” detyrën për të përgatitur Evropën për kushte më të nxehta, ndërsa ai i ka bërë thirrje autoriteteve që të intensifikojnë masat mbrojtëse ndaj ngrohjes globale, pasi intensifikimi i ekstremit të motit po përbën kërcënim për jetën dhe pasuritë.
Në një raport të ri, ESABCC paralajmëron se ngrohja globale mund të arrijë deri në 2.8–3.3°C më shumë se nivelet paraindustriale, duke shtuar se përpjekjet për përshtatje janë aktualisht të vonuara dhe jo të mjaftueshme për të menaxhuar rreziqet nga ngjarjet ekstreme të motit. Fenomenet e tilla si reshjet e dendura, valët e nxehtësisë dhe zjarret pyjore janë bërë gjithnjë e më të zakonshme, duke shkaktuar dëme të mëdha dhe humbje jetësh. Kështu, raporti thekson nevojën për vlerësime të rrezikut klimatik dhe përfshirjen e qëndrueshmërisë klimatike në të gjitha politikat e BE-së.
Van Aalst gjithashtu kujtoi se, dy dekada më parë, ishte menduar se efektet ekstreme të klimës do të përbënin një problem kryesor për vendet më të varfra. Por, sipas tij, tani është e qartë se Evropa është gjithashtu e cenueshme për përballimin e kushteve ekstreme që ajo nuk i ka përjetuar më parë.
Kjo situatë kërkon ndërhyrje urgjente për forcimin e sistemeve të paralajmërimit të hershëm dhe rritjen e investimeve, përfshirë nga sektori privat, në masat mbrojtëse ndaj ndryshimeve klimatike.
Me një të ardhme të tillë të ngrohjes globale, Van Aalst theksoi se rreziku do të rritet ndjeshëm dhe për disa pasoja, mund të arrihen kufijtë e përshtatjes. Ai bëri thirrje për masa të menjëhershme për të shmangur një të ardhme me ngrohje kaq ekstreme, duke theksuar se kjo mund të çojë në rreziqe të paimagjinueshme për shoqëritë dhe ekosistemet.