Ambasada e Shteteve të Bashkuara të Amerikës në Tiranë ka ndarë mesazhin e presidentit amerikan Donald Trump, i cili uroi besimtarët myslimanë në mbarë botën me rastin e nisjes së muajit të shenjtë të Ramazanit.
Në mesazhin e tij, Trump përcjell “urimet më të mira për të gjithë besimtarët myslimanë që festojnë Ramazanin”, duke e cilësuar këtë periudhë si një kohë ripërtëritjeje shpirtërore, meditimi dhe mirënjohjeje për bekimet e Zotit.
“Çdo Ramazan përfaqëson një periudhë të shenjtë të ripërtëritjes shpirtërore, meditimit të thellë dhe mirënjohjes për bekimet e panumërta të Zotit. Kjo kohë e shenjtë për shumë amerikanë thekson rëndësinë e lutjes dhe agjërimit, forcon lidhjet familjare dhe komunitare si dhe përforcon vlerat tona të përbashkëta të dhembshurisë, bamirësisë, mëshirës dhe përulësisë”, thuhet në mesazh.
Presidenti amerikan nënvizon gjithashtu rëndësinë e lirisë fetare, duke e cilësuar atë si një të drejtë të dhënë nga Zoti dhe një shtyllë të prosperitetit të Shteteve të Bashkuara.
“E drejta e dhënë nga Zoti për të adhuruar lirisht është një tipar dallues i kombit tonë dhe një shtyllë e prosperitetit dhe fuqisë sonë. Administrata ime siguron që të gjithë qytetarët të mund të praktikojnë besimin e tyre, të ndjekin ndërgjegjen e tyre dhe të adhurojnë lirisht – sepse liria e fesë nënkupton lirinë për ta praktikuar fenë tënde me krenari dhe pa frikë nga përndjekja”, thekson ai.
Në përmbyllje të mesazhit, Trump shpreh lutjet për paqe, unitet dhe begati gjatë kësaj periudhe, duke uruar lumturi dhe suksese për familjet në mbarë botën.
Besimtarët myslimanë kanë nisur agjërimin e Ramazanit, i cili zgjat 30 ditë dhe konsiderohet si muaji i agjërimit, i Kuranit, i mëshirës dhe i faljes.