500 mijë euro ia kapën në Durrës, E.Ç e provon nga Vlora, Policia e arreston pasi kishte mbushur furgonin me verë e ilaçe kontrabandë

E.Ç, një i ri nga Lushnja që në tetor të vitit të kaluar u ndalua në Portin e Durrësit, pasi në autobusin e linjës që ai drejtonte u zbuluan 500 mijë euro të padeklaruara. 32 vjeçari deklaroi se ishin kursime të familjes dhe po i sillte në Shqipëri nga Italia sepse do investonte në Lushnjë.

Mirëpo, pa mbyllur ende “hesapet” me drejtësinë, E.Ç ka provuar të fusë nga Porti i Vlorës mallra kontrabandë. Edhe kur u dnalua në Durrës, veç parave të fshehura autobusi i linjës Itali-Shqipëri dhe anasjelltas kishte elektroshtëpiake dhe mallra të tjera pa faturë.

Policia e Vlorës njofton se ka arrestuar 32 vjeçarin në kushtet e flagrancës, pasi gjatë kontrollit të ushtruar furgonin në Port, u gjetën dhe sekuestruan kuti me medikamente mjekësore, kuti me lëndë të ndaluar pesticide dhe kuti me shishe vere, pa faturë blerjeje.

Njoftimi i plotë i Policisë së Vlorës:

Shërbimet e PKK Port Vlorë, në bashkëpunim me specialistët e Seksionit për Hetimin e Krimeve Ekonomike dhe Financiare të DVP Vlorë dhe autoritetet doganore në këtë port, në vijim të kontrolleve për goditjen e paligjshmërisë, bazuar në analizën e riskut dhe në kontrollet me përzgjedhje, në hyrje të RSH-së, kanë kaluar në vijën e dytë, për kontroll më të imtësishëm, furgonin me drejtues shtetasin E.Ç.

Gjatë kontrollit të ushtruar në këtë furgon, shërbimet e Policisë gjetën dhe sekuestruan kuti me medikamente mjekësore, kuti me lëndë të ndaluar pesticide dhe kuti me shishe vere, pa faturë blerjeje.

Në përfundim të veprimeve, specialistët e Seksionit për Hetimin e Krimeve Ekonomike e Financiare të DVP Vlorë arrestuan në flagrancë shtetasin E.Ç, 32 vjeç, banues në Lushnjë, për veprat penale  “Kontrabanda me mallra për të cilat paguhet akcizë”, “Kontrabanda me mallra të ndaluara” dhe “Kontrabanda me mallrat e licencuara.”

Materialet i kaluan Prokurorisë, për veprime të mëtejshme.