I aksesueshëm për të gjithë, hapet sot aksi Thumanë-Kashar

Kryeministri Edi Rama e ka nisur ditën me lajmin e mirë se sot hapet aksi Thumanë-Kashar.

Ai ka ndarë pamje nga rruga e përfunduar teksa shkruan se ky aks u shërben të gjithëve dhe zhvillimit të mëtejshëm të turizmit. Aksi Thumanë-Kashar do të jetë i aksesueshën për të gjithë prej ditës së sotëm në orën 19:00.

“MIRËMËNGJES  dhe me këtë fluturim mbi Thumanë-Kashar për të shijuar atë që është ndërtuar në tokë, një aks rrugor që na shërben të gjithëve dhe zhvillimit të mëtejshëm të turizmit duke qenë i aksesueshëm për të gjithë nga sot prej orës 19:00, ju uroj të diel të mbarë”, shkruan Rama në postimin e tij.

Aksi Thumanë-Kashar, pjesë integrale e korridorit Blu, i pari i kategorisë A të Bashkimit Europian, hapet sot.

Autostrada e re shtrihet në zonat urbane dhe gjysmë urbane të Thumanës, Fushë-Krujës, Rinasit dhe Vorës, duke i dhënë një frymëmarrje të shumëpritur qarkullimit në një pikë kritike që pret prej vitesh këtë zgjidhje europiane, ndërkohë që gjatë qershorit lidhen kontratat për segmentet Kashar – Lekaj – Fier dhe Thumanë – Milot, si edhe hapet gara për segmentet Milot – Balldren dhe Balldren – Muriqan, të cilat plotësojnë të gjithë trupin e Korridorit Blu, si pjesë e unazës europiane të turizmit mesdhetar.

Aksi përmbush të gjitha parametrat e sigurisë rrugore, me mbikalime, 11 ura, 12 nënkalime e kryqëzime, por edhe rrugë aksesi për qytetarët.