PD sërish drejt ngërçit?! Lulzim Basha paralajmëron “rekurs të menjëhershëm” në Gjykatën e Lartë për vulën

Gjykata e Apelit në Tiranë ka zbardhur këtë të premte vendimin për kalimin e vulës dhe logos së Partisë Demokratike në duart e Sali Berishës. Mirëpo, menjëherë pas bërjes publik të vendimit, ka ardhur dhe reagimi i Lulzim Bashës.

Ai e konsideron skandaloz vendimin e marrë më datë 11 Qershor 2024 nga trupa gjykuese e kryesuar nga Alma Ahmeti, me anëtarë Elona Toron dhe Iliba Bezati.

“Zbardhja e vendimit skandaloz të 11 qershorit, i hapë rrugë rekursit tonë të menjëhershëm në Gjykatë të Lartë. Ne nuk e pranojmë padrejtësinë. Shqipëria meriton më shumë”,shkruan demokrati Lulzim Basha, ndërsa disa herë ka deklaruar se është drejt hapjes së një partie të re.

Sipas Gjykatës së Apelit, ankimimi i Enkelejd Alibeaj është konsideruar i pavlefshëm, pasi në kohën që ka dorëzuar ankimimin në gjykatë, nuk ka patur asnjë tagër, sepse edhe vetë autorizimi që Lulzim Basha i kishte lënë atij ishte i pavlefshëm.

Sipas togave të zeza, ditën që Lulzim Basha ka dhënë dorëheqjen publikisht nga drejtimi i Partisë Demokratike, ai nuk ka pasur fuqi juridike që t’ia dorëzonte drejtimin e partisë Enkelejd Alibeaj. Rrjedhimisht, edhe “mandatimi” i këtij të fundit si kryetar i komanduar ka qenë i pavlefshëm.

Në kushtet e kësaj pavlefshmërie, Enkelejd Alibeaj nuk ka qenë i legjitimuar të as të bënte ankimim në gjykatë.

Pjesë nga vendimi i zbardhur nga Gjykata e Apelit:

“Gjykata e Apelit vlerëson se pavarësisht se dorëheqja e kryetarit të PDSH z. Lulzim Basha nuk është kryer në formën shkresore dhe as ka gjetur pasqyrim në regjistrin e partive politike, është një fakt i njohur botërisht dhe i pranuar dhe nga organe të tjera administrative dhe gjyqësore vendimnarrëse në procesin zgjedhor. Sipas vendimit nr.27, datë 16.03.2023 të KAS të lënë në fuqi me vendimin nr.5 datë 27.03.2023 të Kolegjit Zgjedhor Gjyqësor, PDSH është përfaqësuar në zgjedhjet vendore të vitit 2023 me nën/kryetar z.Enkelejd Alibeaj, për shkak se është pranuar që kryetari z.Lulzim Basha ka dhënë dorëheqje në datë 21.03.2022. Nga këto akte provuese, provohet se z.Lulëzim Basha nuk ka qenë organi që përfaqëson juridikisht tek të tretët PDSH-në, në momentin e regjistrimit të ankimit 04.04.2022, pasi është njohur dorëheqja e tij në datë 21.03.2022.

Autorizimi për përfaqësim te të tretët, është një akt i njëanshëm delegimi kompetencash. Në rastin e autorizimit\prokurës së lëshuar nga personi juridik, nënshkruesi i saj nuk delegon tagra personale por tagra që lidhen eskluzivisht me detyrën apo pozicionin përkatës. Efektet juridike të autorizimit apo vlefshmëria e tij mbaron automatikisht me mbarimin apo humbjen e kompetencave të personit nënshkrues të autorizimit.

Me dorëheqjen publike të z.Lulzim Basha në datën 21.03.2022 autorizimi i lëshuar nga ky i fundit për z.Alibeaj ka mbaruar juridikisht dhe nuk ka qënë më i aftë të prodhojë asnjë pasojë juridike. Autorizimi i z.Lulzim Basha i datës 15.09.2021 nuk kishte më vlerë juridike pas datës 21.03.2022, pas dorëheqjes së tij publike. Gjykata e apelit vlerëson se z. Alibeaj nuk ka pasur legjitimim procedural në përfaqësimin e ankuesit PDSH në gjykim dhe në paraqitjen dhe nënshkrimin e aktit “Ankim”.

Në kushtet kur përfaqësuesi me autorizim z.Enkelejd Alibeaj, ka bërë ankim kundër vendimit të gjykatës së shkallës së parë pas mbarimit të efekteve juridike të autorizimit, ankimi/apeli i paraqitur nga ky përfaqësues konsiderohet si ankim i bërë nga një person që nuk legjitimohet, si përfaqësues pa tagra.

Për sa më sipër, Gjykata e apelit vlerëson se ankimi i paraqitur nga përfaqësuesi me autorizim z.Enkelejd Alibeaj nuk plotëson parakushtet formale-procedurale për shqyrtimin e tij, pasi është nënshkruar nga një person që nuk legjitimohet të bëjë ankim dhe si i tillë në bazë të nenit 450/ç të KPC, i ndryshuar, nuk duhet të pranohet”, theksohet në vendim.