Sulmi kibernetik, rikthehen disa shërbime qeveritare online

Agjencia qeveritare për Media dhe Informon bën me dije se disa shërbime qeveritare online janë rikthyer në funksionim.

Në një njoftim për mediat, kjo agjenci sqaron se plani i emegjencës për të përballuar sulme kibernetike të tilla po funksionon.

“Kunderofensiva e AKSHI-t dhe aleatëve ndaj sulmit kibernetik po ecën me ritme të shpejta dhe në përputhje me planin e emergjencës. Pas një pune të jashtëzakonshme, prej 96 orësh papushim, nga ekipi i inxhinierëve dhe ekspertëve IT të AKSHI-t, ndihmës së skuadrës së Microsoft DART (Detection and Response Team) dhe partnerëve të “Jones Group International”, po kthehemi në normalitet”.

Kështu, janë rikthyer faqet online të Ministrive, sistemi i fiskalizimit e të tjera shërbime. Por për e-Albania vijon të jetë ende jo në funksionim.

“Faqet zyrtare të ministrive dhe sistemi i fiskalizimit janë rikthyer në funksion të plotë brenda 12 orësh.

Që prej ditës së djeshme është kthyer në funksion të plotë:

Drejtoria e Përgjithshme e Shërbimit të Transportit rrugor me sistemin e lejeve të drejtimit dhe sistemin e targave;

Drejtoria e Përgjithshme e Doganave;

Fondi i Sigurimit të Detyrueshëm të Kujdesit Shëndetësor me sistemin e recetës elektronike;

Agjencia Kombëtare e Barnave dhe Pajisjeve Mjekësore me sistemin e barnave.

Po punohet me intensitet për kthimin një e nga një të të gjitha shërbimeve që ofrohen në e-Albania dhe rikthimin në funksionalitet të plotë të sistemeve të tjera”.

Agjencia për Media dhe Informim thotë se “ndjekja e protokolleve të reagimit ndaj sulmeve kibernetike, izolimi i menjëhershëm i infrastrukturave dhe sistemeve qeveritare, që në momentet e para, bëri që sistemet qeveritare të dalin të paprekura. Kjo rezultoi kundërpërgjigjia e duhur ndaj këtij sulmi masiv të pandodhur kurrë më parë ndaj vendit tonë”. 

tv6+1vlora