Komisioni për Çështjet Ligjore dhe Administratën Publike miratoi sot shtimin e 47 punonjësve me kohë të pjesshme në Komisionin Qendror të Zgjedhjeve, për përpunimin e dokumentacionit zgjedhor.
Punonjësit do të angazhohen për dy proceset zgjedhore të vitit 2025: zgjedhjet parlamentare të 11 majit dhe zgjedhjet e pjesshme vendore. Ata do të përfshihen në hapjen e kutive të votimit, administrimin e dokumentacionit dhe arkivimin e materialeve zgjedhore nga vitet 2006-2008.
Pjesa më e madhe e stafit do të punojë për hapjen e kutive dhe asgjësimin e fletëve të votimit, ndërsa një grup prej 15 punonjësish do të fokusohet te procesi i arkivimit për një periudhë 8-mujore. Të gjitha kutitë e përfshira në hetime ligjore mbeten të paprekura deri në përfundimin e procedurave.
Fondet për këtë angazhim do të mbulohen nga buxheti i KQZ-së për vitin 2026. Ky është viti i tretë që Komisioni realizon procesin e arkivimit të dokumentacionit zgjedhor, ndërkohë që vazhdon detyrimi ligjor për hapjen e kutive pas çdo procesi zgjedhor.