Prezantohet trajneri i ri, i pranishëm edhe Reja: Bëra një punë të shkëlqyer! Po lë mbrapa një pjesë të zemrës sime

I pranishëm në prezantimin e trajnerit të ri të kombëtares ishte edhe trajneri që sapo u largua. Edy Reja. Në fjalën e tij të ‘lamtumirës’ Reja tha se ka bërë punë shumë të mirë dhe se një pjesë të zemrës po e lë në Shqipëri.

“Jam jashtëzakonisht i emocionuar në këto momente. Çdo rrugëtim e ka një fundit por si nga ana e rezultateve por edhe raportet njerëzore bashkëpunimi ka qenë shumë i mirë. Rezultatet që kemi arritur nuk janë për tu lënë mënjanë. Kemi bërë të luajnë për herë të parë rreth 40 lojtarë, kemi qenë shumë afër kualifikimit në botëror dhe për 1 pikë mund edhe të kishim kaluar në ndeshjet me eliminim direkt. Kam gjetur një skuadër që nuk kishte as krye dhe as fund. Pra kemi bërë një punë të jashtëzakonshme. Dua të falënderoj stafin dhe federatën. Po largohem por po lë mbrapa një pjesë të zemrës time. Unë largohem me kokën lart”, tha ai, duke i uruar suksese pasuesit të tij.