Anija me mbetje toksike, Shehaj: Duhet hetim ndërkombëtar, nuk mund të lejojmë që të groposen nëpër Shqipëri

Kryetari i Partisë Mundësia, Agron Shehaj deklaroi se është e pabesueshme që Ministria e Brendshme dhe ajo e Mjedisit, që nuk kanë arritur të ndalojnë trafikimin e mbetjeve toksike nga Porti i Durrësit, kanë marrë në dorë procesin e zbardhjes së kësaj afere.

“Ministria e Brendshme dhe Ministria e Mjedisit, në rastin më të mirë për ta, nuk kanë arritur të ndalojnë trafikimin e mbetjeve toksike nga porti i Durrësit. Në rastin më të keq, janë pjesë e këtij trafikimi. Kjo është e pabesueshme. Si mundet dikush që është i dyshuari kryesor të bëjë hetimin mbi këtë aferë ” – u shpreh Shehaj. 

Shehaj bën thirrje për hetim ndërkombëtar për këto mbetje, teksa ngre alarmin se ato mund të groposen fshehurazi në Shqipëri. 

“Është e domosdoshme një hetim ndërkombëtar që të zbardhi këtë aferë dhe të kuptojmë se çfarë mbetjesh toksike ka në këta kontenierë dhe të zbulojmë dhe të gjejmë mënyrën më të mirë për të asgjesuar këto mbetje. Nuk mund të lejojmë që kjo aferë mos të hetohet, nuk mund të lejojmë që këto mbetje toksike të groposen diku nëpër Shqipëri dhe askush mos të marri vesh se çfarë është bërë me to dhe shëndeti i qytetarëve të vihet në rrezik.”