Përgjatë ditëve të fundit sytë e të gjithë botës ishin në një vend, pikërisht në ceremoninë e inaugurimit të presidentit të 47-të të Shteteve të Bashkuara të Amerikës, Donald Trump.
Një ditë para të hënës së madhe, ku Trump me dorën në Bibël u betua si Presidenti i amerikanëve, figura të njohura e personalitete të shquara u bënë bashkë në një festë të madhe e cila u mbajt në Uashington.
Pjesë e kësaj mbrëmje të organizuar nga NewsMax, në nder të inaugurimit të presidentit Trump kanë qenë dhe dy politikanët shqiptarë, Lulzim Basha dhe Orjola Pampuri.
Senatori i Teksasit, Ted Cruz dhe Orjola Pampuri
Kanë qenë vetë këta të fundit të cilët në rrjetet e tyre sociale kanë postuar pamje nga festa, madje dhe nga takimet me persona të rëndësishëm të kabinetit Trump.
Demokrati euroatlantik, Basha, pati kënaqësinë të takohej me të përzgjedhurin e Trump për postin e Sekretarit të Thesarit, Scott Bessent. Gjatë këtij takimi, ata diskutuan lidhur mbi mbi potencialin ekonomik që mund të realizohet jo vetëm në Amerikë, por edhe në vende më të vogla si Shqipëria, në kuadër të “një epoke të re të artë ekonomike”.
“E informova mbi vizionin tonë, të pasqyruar në programin qeverisës, për taksa të ulëta dhe për nxitjen e investimeve në sektorin e teknologjisë – një qasje që do të çlirojë potencialin ekonomik të vendit tonë. Gjithashtu, shkëmbyem mendime mbi planet e administratës së re amerikane në fushën ekonomike, të cilat pritet të kenë një ndikim jo vetëm në SHBA, por edhe në ekonominë globale”, shkruante Basha, teksa më tej bëri me dije se gjatë këtij eventi kishte takuar edhe një ndër njerëzit më të besuar të presidentit të SHBA-së, Richard Grenell.
Scott Bessent dhe Basha
“Kënaqësi të bisedoja me Dërguarin e Posaçëm Presidencial për Misione të Veçanta, Richard Grenell, gjatë ceremonisë së veçantë të organizuar në prag të inaugurimit të Presidentit Trump. Për shqiptarët, SHBA-të mbeten aleati dhe partneri ynë strategjik. Forcimi i bashkëpunimit dhe bashkërendimit me to është një prioritet madhor”, shkruante Basha krah fotove.
Basha dhe Grenell
Por, ajo që ka tërhequr vëmendjen e të gjithëve në Shqipëri ka qenë mungesa në këtë ceremoni e mbështetësve të Sali Berishës.
Ndonëse këta të fundit, që prej nëntorit kur u vulos që Donald Trump do të jetë presidenti i Shteteve të Bashkuara të Amerikës, nuk kanë kursyer deklaratat e njëpasnjëshme e nuk kanë fshehur optimizmin e tyre mbi të mirat që presidenti do të sjellë për Partinë Demokratike, duke ia hequr “non-gratën”, liderit të tyre.
Për aq sa dhe kemi parë nëpër rrjetet sociale, as një nga deputetët e Partisë Demokratike apo dhe mbështetësit e Sali Berishës nuk kanë qenë pjesë e festimeve të inaugurimit të Trump.
Instagram
Facebook
Youtube
Whatsapp
Discussion about this post