Berisha nis premtimet elektorale: Nuk do ketë rrogë mesatare nën 1200 euro nëse ne vijmë në pushtet

Ish-kryeministri Sali Berisha deklaroi këtë mbrëmje se do të rrisë pagën mesatare në Shqipëri në 1200 euro nëse Partia Demokratike do të vijë në pushtet.

Ai ka theksuar se nuk do të ketë paga më të larta se katërfishin e pagës mesatare, ndërsa gjithashtu është zotuar për një qasje të re ekonomike që vendos qytetarin në qendër të investimeve. Lideri i PD premtoi gjithashtu që çdo shqiptar të ketë një nivel minimal të ardhurash prej 200 euro në muaj, duke përfshirë pagat e papunësisë dhe ndihmën ekonomike

Deklarata e Berishes:

Nuk do ketë rrogë mesatare nën 1200 euro. Nuk do ketë rrogë maksimale më shumë se katërfishin e rrogës mesatare. Ndaj miqtë e mi unë jam këtu për t’u zotuar se qeveria dhe programi i ardhshëm i PD do ketë ligjin e parë, çdo buxhet investimi kryesor tek njeriu, tek njeriu, tek njeriu. Asnjë rrogë më e lartë se katërfishi i rrogës mesatare në Republikën e Shqipërisë.

Vidhni sa të mundni hajdutë, për hundësh do ua nxjerrim, kudo që t’i fshihni do ua gjejmë, qytetarëve do ua kthejmë. A mundet në një republikë të vlerave, që një njeri të marrë sa 70 pensionistë? A mundet në një republikë të ligjit, Kushtetutës, që një zyrtar të marrë sa rrogën mesatare të 10 zyrtarëve?

Këto marrin fund miqtë e mi. Rrogat, fondet do shkojnë për pensionet, që nuk do ketë më pension kurrë nën 200, ose do llogaritet mbi bazën e minimumit jetik prej 200 euro. Nuk do ketë ndihmë ekonomike nën 200 euro. Nuk do ketë pagesë papunësie nën 200 euro.

Nuk do ketë shqiptar që do marrë në muaj më pak se 200 euro. Jo, jo, nuk do ketë rrogë minimale nën 500 euro. Nuk do ketë rrogë mesatare nën 1200 euro. Nuk do ketë rrogë maksimale më shumë se katërfishin e rrogës mesatare. Do i japim fytyrën njerëzore republikës. Do të bëjmë që taksat e tyre, e qytetarëve, e biznesmenëve të shndërrohen në mirësi të merituara plotësisht për qytetarët.