Bordi ndryshon sërish çmimet e karburanteve

Ulet me 9 lekë nafta dhe me 12 lekë benzina

Pa kaluar 24 orë nga vendimi i fundit, Bordi i Transparencës është mbledhur sërish këtë të mërkurë duke vendosur për një ulje të çmimit të karburanteve.

Në pikat e shitjes me pakice 1 litër naftë do të tregtohet me 9 lekë më pak, duke u rikthyer në çmimin e 243 lekëve për 1 litër nga 252 lekë që shitet aktualisht.

Po ashtu edhe benzina do të blihet me 12 lekë më pak. Me vendimin e ri të Bordit të Transparencës drejtuesit e automjeteve do te paguajnë 229 lekë për një litër benzinë, nga 241 lekë që është aktualisht.

Çmimi i gazit të lëngshëm për automjetet mbetet i pandryshuar, duke qëndruar në çmimin 81 lekë për litër. Këto çmime do të hyjnë në fuqi nga ora 18:00 dhe do të jenë të vlefshme deri në mbledhjen tjetër të bordit.

Në rast se konstatohen shkelje të çmimeve tavan nga operatorët e ndryshëm do të vendosen nga gjoba e deri në pezullim të aktivitetit.

tv6+1vlora