DASH vlerëson SPAK: Institucion elitar i ngritur me ndihmën e Amerikës, ka arrestuar disa ish-ministra, deputetë e zyrtarë të tjerë

Departamenti Amerikan i Shtetit (DASH) ka vlerësuar punën e bërë nga Prokuroria Speciale në Shqipëri. Gjatë një eventi për Kampionët e rinj antikorrupsion për vitin 2022 në botë, është vlerësuar dhe puna e bërë nga SPAK, kundër korrupsionit dhe krimit të organizuar.

“Me ndihmën e SHBA-së, Shqipëria krijoi një Organ të Posaçëm Kundër Korrupsionit si një ent i ri elitar kundër korrupsionit dhe krimit të organizuar. Në muajt e fundit, organi ka arrestuar ish-ministra, deputetë në detyrë, gjyqtarë, policë, prokurorë, kryebashkiakë dhe krerë nga krimi i organizuar”, thuhet në DipNote.

Pas takimit personal që Ndihmës Sekretari i DASH – autori i kësaj DipNote, pati edhe me Drejtuesin e SPAK, Arben Kraja, siguroi në emër të Departamentit Amerikan të Shtetit se, SHBA do të vazhdojë ta mbështesë edhe më fuqimisht SPAK në ngritjen e kapaciteteve dhe rritjen e rezultateve në luftë kundër krimit të organizuar, pastrimit të parave dhe korrupsionit të nivelit të lartë.