Kapet 4.3 ton kokainë! Goditet grupi kriminal “Clan del Golfo” në Itali, shpërndanin lëndën narkotike në disa shtete të Europës

4.3 ton kokainë  dhe dy milionë euro para cash janë sekuestrua në Itali, në një mega-operacion nga policia, që goditi një organizatë kriminale.

Policia njofton se ka shkatërruar organizatën “Clan del Golfo” , më e rëndësishmja mes narkotrafikantëve kolumbianë. Kreu i këtij grupi Dario Antonio Usuga David, është arrestuar dhe është ekstraduar drejt Shteteve të Bashkuara të Amerikës.

Janë lëshuar urdhër-arrestet për 38 persona të akuzuar për trafik ndërkombëtar droge në Itali, Slloveni, Kroaci, Bullgari, Holandë dhe Kolumbi.

Sasia e sekuestruar e lëndës narkotike, që vlerësohet të jetë paguar për rreth 96 milionë euro nga grupet e blerësve kriminalë është ndër më të mëdhatë e kapura ndonjëherë në Europë. Në tregun italian, shitjet me pakicë do të kishin arritur më shumë se dyfishi i kësaj vlere, duke kapur një çmim prej të paktën 240 milionë euro, sipas mediave italiane.

Në këtë operacion, u evidentuan 19 “dërgesa të kontrolluara” radhazi, midis majit 2021 dhe majit 2022, falë të cilave u identifikuan ndërmjetësues të rëndësishëm në sistemin botëror të trafikut të drogës dhe një numër i madh transportuesish që operojnë brenda dhe jashtë Italisë.