Procedura lehtësuese për të kaluar kufirin Shqipëri-Kosovë gjatë fundjavave dhe festave zyrtare

Ministri i Brendshëm i Kosovës ka bërë të ditur se një nga marrëveshjet që do të nënshkruhet sot në mbledhjen e 8 të qeverive Shqipëri-Kosovë, do të jetë ajo e lehtësimit të procedurave për kalimin e qytetarëve në kufirin mes dy vendeve.

Bëhet fjalë për fundjavat dhe festat zyrtare të të dy vendeve deri në fund të Shtatorit.

Ministri i Brendshëm i Kosovës: Policia e Kosovës dhe Policia e Shqipërisë gëzon një bashkëpunim të shkëlqyer qoftë në luftimin e legaliteteve që cënojnë sigurinë e vendeve tona, qoftë në afrimin e sigurisë dhe në ruajtjen e jetës së qytetarëve tanë. Në kuadër të kësaj, sot do të nënshkruajmë zyrtarisht marrëveshjen e cila do të krijojë lehtësira të kalimit kufitar në pikën e cila ka kalimin më të madh të qytetarëve të dy vendeve tona, Vernicë, Merdare. Kjo marrëveshje do të rregullojë dhe do të zvogëlojë procedurat e pritjeve dhe do të bashkërendojë punën e policisë sonë kufitare. Deri në fund të Shtatorit do të ketë kalim të lehtësuar të kufirit ndërsa marrëveshja do të përcaktojë procedura të tilla lehtësuese që do të jetë për çdo fundjavë dhe çdo festë zyrtare të vendeve tona.

Kryeministri Rama: A mund ta dimë nga ju se si do kalohet kufiri në Korrik dhe në Gusht? Çfarë janë këto disa lehtësira. Se këtu bëhet fjalë që kur shkon njeri për plazh të mos ndalojë. Kjo është ideja.

Ministri i Brendshëm i Kosovës: Herën e fundit kur isha në Shqipëri para disa ditësh, polici kufitar në Vërmicë më uroi udhë të mbarë.

Kryeministri Rama: A mund t’ja u kurseni dhe këtë urim qytetarëve dhe ata kur kalojnë të mos kenë polic fare aty që t’i urojnë edhe të ketë thjesht ndalime të rastësishme për çdo 500 makina? Mund të ndodhi kjo apo është krejtësisht e pamundur? Duhet patjetër një polic që t’i shohë dhe t’i thotë mirë se erdhët?

Ministri i Brendshëm i Kosovës: Realisht atë e mundëson protokolli.

Kryeministri Rama: Siç e shikoni, unë e kam thënë që në mbledhjen e parë, vetëm ministrat e Brendshëm mund të bëjnë një marrëveshje se si do zbatohet një marrëveshje që e kanë bërë më përpara. Shpresojmë të jetë i fundit ky protokoll edhe shpresojmë që në Korrik qytetarët të vijnë pa ja uruar policia mirë se ardhjen.