Shoferët e rinj s’do lejohen të drejtojnë makina me fuqi të lartë motorike në 2 vitet e para! Zgjatet vlefshmëria e patentës! Ja disa nga ndryshimet në Kodin Rrugor

Duke marrë shkas nga aksidenti tragjik i ndodhur pak ditë më parë tek rreth rrotullimi i TEG, ku një 20 vjeçar po lëvizte me shpejtësi skëterrë e për pasojë humbi jetën së bashku me 2 vajzat pasagjere, nevojat e ndryshimit Kodit Rrugor u bënë emergjente. Dje, edhe me votat e opozitës, (102 vota) u miratuan në Kuvend disa ndryshime të rëndësishme, qëllimi i së cilës është të ndikojë në uljen e numrit të aksidenteve rrugore.

Më konkretisht, për 2 vitet e para nga pajisja me patentë, shoferëve u ndalohen mjete me fuqi të lartë motorike. Gjithashtu, një nga ndryshimet më të rëndësishme të Kodit Rrugor, është ai për zgjatjen e vlefshmërisë së patentave deri në 15 vite. 

Akset kombëtare do të çlirohen nga prezenca e policisë, ku siguria rrugore do të mbikëqyrjet nga makinat inteligjente. Me ndryshimet e Kodit Rrugor, efektivët dhe postoblloqet e policisë nuk do të qëndrojnë në rrugët nacionale për të ndëshkuar shoferët që shkelin rregullat. Puna e tyre do të zëvendësohet me pajisje inteligjente. Në vendin tonë risi për rrugoren do të jenë makinat e reja teknologjike të cilat nuk do të pikasin vetëm shkelësit, por do të skanojnë edhe problemet e tjera, si gjobat e papaguara, e deri tek kolaudimi.

Një tjetër pikë që do të ndryshojë në Kodin Rrugor është edhe rritja e shpejtësisë në ato autostrada që plotësojnë standardet e duhura. Në favor të qytetarëve është parashikuar edhe përgjysmimi i gjobës nëse paguhet brenda afatit të caktuar. Më herët shoferët që paguanin një masë administrative brenda 5 ditësh, përfitonin 20% ulje. Tashmë me rregullat e reja, nëse paguhet brenda 15 ditëve, vlera e gjobës do të paguhet me 50% ulje. Mirëpo,  nga ana tjetër, Kodi i ri parashikon ashpërsim dhe dyfishim të masës administrative për qytetarët që u hiqet patenta. Kjo kategori shkelësish do të paguajnë dyfish të gjobës, për të mos iu tërhequr leja e drejtimit. Një tjetër problematikë ka qenë edhe vendparkimet publike. Në këto kushte është kërkuar që 50% e parkimeve të jetë pa pagesë.

Ndryshimet e miratuara
-Mbajtësit e lejeve të drejtimit të kategorisë B, në 2 vitet e para të lëshimit, nuk u lejohet të drejtojnë mjete motorike me fuqi specifik, referuar masësh bosh të mjetit, më të madhe se 55KË/ton! Për makinat hibrike elektrike ose plug-in, kufiri specifik i fuqisë është 65 ton KË/ton, duke përfshirë peshën e baterisë.  

-Qytetarëve të cilëve iu është anuluar leja e drejtimit shqiptare për efekt konvertimi jashtë vendit, mund të rimarrin lejen e drejtimit shqiptare pa testim, drejtpërdrejtë dhe nëse leja e drejtimit e huaj ka skaduar, pasi e dorëzojë atë dhe heqin dorë vullnetarisht prej saj.

-Zgjatja e se drejtës për ushtrimin e profesionit të instruktorit të autoshkollës deri në 70-vjeç, nga 65-vjeç që është aktualisht.

Rinovimi i lejedrejtimit të kategorive

AM,A1, A2, A, B1, Bdhe BE

Ishte
Çdo 10 vite deri 50 vjeç
Çdo 5 vite, mbi 50 vjeç
Çdo 3 vite mbi 70 vjeç

Bëhet
Çdo 15 vite deri 70 vjeç
Mbi 70 vjeç konfirmimi i vlefshmërisë bëhet pas dorëzimit të certifikatës mjekësore

C1, C1E, C, CE

Ishte
Çdo 5 vite deri në 65 vjeç
Çdo 2 vite, mbi 65-vjeç

Bëhet
Çdo 5 vite, deri 70-vjeç (për personat mbi 65-vjeç vetëm për mjetet deri në 20 ton)
D1, D1E, D dhe DE

Ishte
Çdo 5 vite deri në 65 vjeç
Çdo 3 vite mbi 65-vjeç
Bëhet
Çdo 5 vite deri në 70-vjeç, për personat mbi 65 vjeç lëshohet vetë, për drejtimin e mjeteve të kategorisë B dhe BE për taksi dhe transport udhëtarësh me mjet 8+1