E RËNDË në Lushnjë, mjekët e hipën në ambulancë për ta transferuar në Tiranë, vdes nga arresti kardiak 6-vjeçari

Një ngjarje e rëndë është regjistruar mbrëmjen e djeshme në spitalin e Lushnjës. Një fëmijë 6-vjeçar ka ndërruar jetë nga arresti kardiak.

I mituri prej gjatë ditësh ishte sëmurë, ndërsa ditën e djeshme familjarët e tij e kishin dërguar për trajtim në spital.

Sipas mjekëve të këtij spitali, i mituri vuante nga bronkopneumonia bilaterale dhe pasi i janë bërë analizat mësohet gjendja e tij e rënduar, teksa vendosën ta transferonin për trajtim më të specializuar në Tiranë. 

Por, sapo ka hipur në ambulancë, ai ka humbur jetën nga arresti kardiak. Ngjarja e rëndë ka ndodhur në disa minuta.

Mamaja dhe gjyshi i fëmijës 6-vjeçar nuk kanë pranuar t’i bëjnë autopsinë, duke e çuar në banesën e tyre për nderimet e fundit. Ndërsa nuk dihen më shumë detaje rreth kësaj ngjarje, por drejtoria e spitalit të Lushnjës shprehet se Ministria e Shëndetsisë do të japë më shumë detaje për sqarimin e situatës.

Ndërkohë, Policia e Lushnjës thotë se procedurat janë nisur prokurorisë për vlerësimin e këtij rasti tragjik.